കവിതകൾ - ഭാഷ മമ്മു
കവിതകൾ - ഭാഷ മമ്മു
*********
1.
ജാലകം
*****
വെയിൽ വന്ന് തൊട്ടപ്പോൾ
ജാലകത്തിനപ്പുറത്ത്
പേരറിയാപ്പൂക്കളിൽ ഉന്മാദത്തിൻ്റെ പനി തിളച്ചു പൊന്തുന്നൊരു പകലിൽ
എൻ്റെ ജാലകക്കമ്പികളൊരു കറുത്ത പക്ഷി
എന്തിനോ കൊത്തി വലിക്കുന്നു
ഇലകളും വേരുകളുമില്ലാത്ത ജാലകക്കമ്പികളോട്
ഋതുക്കളെ കുറിച്ചുള്ള രഹസ്യം പറയുന്നത്
ആ കറുത്ത പക്ഷിയാവാം.
ഇലകൾ ചേർന്ന് കാടുണ്ടാവുന്ന രഹസ്യമറിഞ്ഞിട്ടും
ജാലകത്തിൽ
ഒരു തളിരും മുളപൊട്ടാത്തത് കൊണ്ടാവും
ഞാനാ ജാലകം പലപ്പോഴും
അടച്ചിടുന്നത്.
2.
പ്രിയം
******
നിന്നെ
കാണാൻ തോന്നുമ്പോഴൊക്കെയും
നിന്നോട് വെറുതെയൊന്ന് മിണ്ടാൻ കൊതിക്കുമ്പോഴൊക്കെയും
നിന്നെയൊന്ന് കെട്ടിപ്പുണരാനെൻ്റെ കൈകൾ തരിക്കുമ്പോഴൊക്കെയും
നിന്നെ ചുംബിച്ച ചുണ്ടിലോർമ്മകൾ
തീക്കൊളുത്തുമ്പോഴൊക്കെയും
നിന്നോട് പിണങ്ങിപ്പിരിഞ്ഞായിരം
കാട്ടു കടന്നൽ മൂളുന്ന തലയുമായ്
ഞാനൊറ്റയ്ക്കിരിക്കുമ്പോഴൊക്കെയും
നിൻ്റെയാകാശസീമയില -
നന്ത നക്ഷത്രങ്ങളിലൊന്നിലെൻ
ചത്ത പക്ഷിയുടെ കൂടെരിയുമ്പോഴും
പ്രിയപ്പെട്ട കവിതേ
ഞാൻ നിന്നെയെന്നത്തേയുംപോലെ
പിന്നെയും
പ്രണയിച്ച് പോകുന്നു.
3.
ബി. നിലവറ
******
എനിക്ക് രഹസ്യങ്ങളുടെയൊരു
ബി.നിലവറയുണ്ട്.
അതിൻ്റെ താക്കോൽ പണ്ടേതോ
ആകാശ ദ്വീപിൽ
മറന്നു വെച്ചതാണ്.
എന്നെക്കാണാതാവുന്ന ചില നിമിഷങ്ങളിൽ
ഞാൻ ബി.നിലവറയിലുണ്ടെന്നറിയുക
ഈ ഏകാന്തതയിലാണ്
എൻ്റെ കാടുകൾ പൂക്കുന്നത്.
തുറന്നിട്ട നിലവയിൽ
പൊഴിച്ചിട്ട പടം മാത്രമാണ്
നിങ്ങൾ കാണുന്നത്
ഇവിടെ
ഈ ബി. നിലവവയിലാണ്
എൻ്റെയുടൽ
നൃത്തം ചെയ്യുന്നത്.
*********
ഭാഷ മമ്മു .
കോഴിക്കോട് ജില്ലയിലെ വടകര.
പേരാമ്പ്ര ഹയർ സെക്കണ്ടറി സ്കൂളിൽ
ഇംഗ്ലീഷ് അധ്യാപിക.
*********